Deputeti popullor shqiptar, Shaip Kamberi, sot në mëngjes ka zhvilluar takim me presidentin e Serbisë, Aleksandar Vuçiq në kuadër rë konsultave për formimin e Qeverisë së re në Beograd.
Është vet Kamberi, që pas takimit, nëpërmjet një postimi në facebook, ka njoftuar për bisedat që ka zhvilluar me presidentin serb, Vuçiq.
Sipas tij, qasja e shtetit ndaj shqiptarëve duhet të ndryshojë, ndërsa rasti i mjekëve të diskriminuar të Preshevës kërkon zgjidhje urgjente, njejtë sikur integrimi i shqiptarëve të kualifikuar në polici.
“Me presidentin Vuçiq diskutuam edhe për nevojën e privatizimit të Banjës së Bujanocit, rritjes së investimeve në nivel lokal dhe ndaljen e gjuhës së urrejtjes ndaj shqiptarëve.
Shkollat në gjuhën shqipe dhe përmirësimi i infrastrukturës në to do duhej të jenë agjendë e qeverisë së re ndërsa riemërimi i shkollës në Bilaç në Ismail Kadare do duhej të siguronte qasje konstruktive të ministrisë. Diplomat kërkojnë zgjidhje urgjente. Nga to varet edhe avancimi i pozitës së shqiptarëve të Luginës dhe sigurimi i një perspektive më të mirë për të gjithë.
Institucionet shtetërore në nivel lokal duhet të hapin dyert për integrimin e shqiptarëve. Mbyllja e tyre nënkupton përjashtim të popullësisë shumicë në Luginë të Preshevës” – ka shrkuar ndër të tjera Kamberi.
Ai, në fund të postimit, ka thënë se “Beteja jonë në realizim e kërkesava tona vazhdon!”
Takimi i sotëm ndërmjet deputeti Shaip Kamberi dhe presidentit Aleksandar Vuçiq është zhvilluar në kuadër të konsultimeve që presidenti i shtetit zhvillon me listat parlamentare të dalura nga zgjedhjet, me qëllim të mandatimin të qeverisë së re./LUGINALAJMI/
