Këshilli i Lartë i Gjyqësorit të Serbisë ka emëruar Aleksandra Kuzmanoviq si kryetare të Gjykatës për Kundërvajtje në Preshevë, një vendim që ka shkaktuar pakënaqësi të forta tek lidershipi shqiptar në Luginën e Preshevës. Ky emërim është vlerësuar nga ata si një akt diskriminimi, pasi shqiptarët përbëjnë gati 95% të popullsisë në këtë komunë, ndërsa serbët vetëm rreth 2%. Sipas këtij reagimi, ky vendim i KLGJ-së është një tjetër dëshmi e diskriminimit të vazhdueshëm ndaj shqiptarëve në sistemin gjyqësor të Serbisë.
Kryetarja e Komunës së Preshevës ka reaguar fuqishëm ndaj këtij emërimi përmes një postimi në rrjetet sociale, duke theksuar se ky vendim vazhdon politikën e margjinalizimit të shqiptarëve nga institucionet shtetërore. Ajo ka theksuar se, në vend të promovimit të barazisë dhe integrimit, emërimi i Kuzmanoviq, një person me përvojë të shkurtër profesionale në Preshevë, është një tregues i diskriminimit ndaj shqiptarëve dhe një injorim i kërkesave legjitime të tyre.
“Këshilli i Lartë i Gjyqësorit, në seancën e tij më 28 nëntor 2024, e emëroi këtë individ në një detyrë të tillë, ndërkohë që profesionistët dhe të rinjtë shqiptarë vazhdojnë të përjashtohen nga pozitat e larta në institucionet shtetërore”, tha kryetarja. Ajo gjithashtu nënvizoi se ky vendim është pjesë e një politike të qëllimshme për të penguar përfaqësimin e shqiptarëve, duke u kundërshtuar marrëveshjeve të arritura, si ajo e Konçulit dhe Plani 7-pikësh, që kërkojnë më shumë barazi dhe përfaqësim të drejtë për shqiptarët.
Ky vendim ka shtuar tensionet dhe shqetësimet rreth moszbatimit të marrëveshjeve dhe politikave për integrimin dhe përfaqësimin e barabartë të shqiptarëve në institucionet shtetërore të Serbisë. Liderët shqiptarë kërkojnë që ky diskriminim të ndalet dhe të zbatohet barazia dhe drejtësia për të gjithë qytetarët pa dallim./LUGINALAJMI/
