Zëvendëskryeministri i Kosovës, Besnik Bislimi, ka reaguar nëpërmjet një postimi në platformën X të hënën rreth mbishkrimit kërcënues “Vdekje shqiptarëve… Kosova është Serbi!” në Bujanoc – komunë me shumicë shqiptare – në pjesën jugore të Serbisë, duke e cilësuar pjesë të një strukture më të gjërë kërcënimesh dhe represionesh kundër popullit shqiptar.
“Një tjetër mesazh urrejtës është hasur sot në hyrje të repartit të fëmijëve [në Shtëpinë e Shëndetit] në Bujanoc. Ky nuk është një incident i izoluar, por pjesë e një strukture më të madhe kërcënimesh dhe represionesh kundër shqiptarëve në Luginën e Preshevës”, ka deklaruar shkurt Bislimi.
Në hyrjen e repartit për fëmijë në Shtëpinë e Shëndetit në Bujanoc, më 19 gusht, është parë një mbishkrim kërcënues e urrejtës: “Vdekje shqiptarëve. Nuk ju duam. Kosova është Serbi!”. Por, ky nuk është rasti i vetëm. Një ditë pas protestës së komunitetit shqiptar kundër politikës diskriminuese të Serbisë, më 13 gusht, u shfaq gjithashtu mesazhi “vdekje shqiptarëve”.
Ndryshe, shqiptarët kanë protestuar javën e kaluar për “identitet dhe dinjitet” kundër politikës represive të regjimit serb. Ata kanë kërkuar nga Qeveria e Serbisë respektimin e marrëveshjeve, ndalimin e pasivizimit të adresave, njohjen e diplomave të Kosovës dhe përfshirjen në institucione./Albanianpost.com
