Lista preliminare e fituesve nga konkursi i Këshillit Kombëtar Shqiptar për mbështetjen e projekteve në fushën e informimit ngre shqetësime serioze mbi kriteret, procesin e vlerësimit dhe vetë kuptimin e asaj që konsiderohet media.
Hulumtimi i portalit LUGINALAJMI tregon se një pjesë e përfituesve nuk janë media në kuptimin profesional të fjalës, por faqe në rrjetet sociale, kryesisht në Facebook, të cilat funksionojnë përmes copy–share përmbajtjesh, pa prodhim origjinal informativ. Disa prej këtyre faqeve janë të njohura vetëm për publikimin e njoftimeve mortore, të stilit “Ina lillahi ue ina ilejhi raxhiun”, çka e bën edhe më problematike përfshirjen e tyre në një konkurs që synon mbështetjen e informimit publik.
Nga ana tjetër, në listën e përfituesve figurojnë edhe media të regjistruara formalisht, por pronarët e të cilave prej vitesh nuk jetojnë në Luginën e Preshevës, por në Kosovë apo në Gjermani. Këto subjekte, sipas verifikimeve tona, nuk janë marrë prej vitesh me prodhim medial, por kryesisht me shpërndarje njoftimesh përmes faqeve të tyre në rrjete sociale, pa prani funksionale të portaleve apo përmbajtje të qëndrueshme redaksionale.
Në përpjekje për të verifikuar punën e këtyre mediave, LUGINALAJMI ka hasur edhe në raste ku nuk ekzistojnë fare linqe aktive të portaleve, apo ku përmbajtja nuk është e qasshme jashtë platformave sociale, çka vë në pikëpyetje serioze kapacitetin dhe legjitimitetin e tyre si media informative.
Procesi i vlerësimit, i realizuar nga një komision i përbërë nga të ashtuquajtur “gazetarë” dhe i mbështetur nga ekzekutivi i Këshillit Kombëtar Shqiptar, nga ky këndvështrim duket i papërshtatshëm dhe i padenjë për rëndësinë e këtij konkursi. Në vend që të forcohet informimi profesional dhe lokal, ky proces rrezikon të banalizojë mbështetjen institucionale për media dhe ta dëmtojë besimin publik.
Në ditët në vijim, LUGINALAJMI do të analizojë në mënyrë të detajuar thirrjen publike, kushtet e vlerësimit dhe përbërjen e Komisionit vlerësues, për të sqaruar përgjegjësinë institucionale dhe profesionale në këtë proces. Po ashtu, LUGINALAJMI do të publikojë në detaje listën e plotë të mediave përfituese nga ky konkurs, në mënyrë që qytetarët e Luginës së Preshevës, por edhe publiku në Republikën e Kosovës, të informohen qartë se si po shpërndahen mjetet nga buxheti i Kosovës dhe kujt po i destinohen ato./LUGINALAJMI/
