Pas publikimit të Raportit të Komisionit Evropian për Serbinë për vitin 2025, ka reaguar edhe zëvendëskryeministri i parë në detyrë i Qeverisë së Kosovës dhe negociatori kryesor për dialogun me Serbinë, Besnik Bislimi. Në reagimin e tij, Bislimi ka theksuar se shkeljet e të drejtave të shqiptarëve në Serbi tashmë janë konstatuar edhe nga Bashkimi Evropian.
“Sivjet në Raportin e Komisionit Evropian për Serbinë konfirmohet se Beogradi vazhdon të dështojë në respektimin e të drejtave të pakicave kombëtare, përfshirë shqiptarët në Preshevë, Bujanoc dhe Medvegjë,” shkroi ai. Bislimi theksoi se raporti vëren se korniza institucionale për mbrojtjen e pakicave mbetet e paplotë dhe se shqiptarët vazhdojnë të përballen me diskriminim, nën-përfaqësim dhe pasivizim të adresave.
Sipas tij, këto praktika përbëjnë një formë të spastrimit etnik përmes mjeteve administrative, që tashmë janë reflektuar edhe në raportin zyrtar të Komisionit Evropian. “Ky pasivizim, i cili është duke u bërë për vite me radhë, është shumë e rëndësishme që më në fund BE ka pranuar ta reflektojë dhe ta bëjë pjesë të vlerësimeve përfundimtare të raportit, duke vendosur theks në kontrollimin e procedurave të pasivizimit,” ka shkruar Bislimi.
Ai shtoi se plani i veprimit për përmirësimin e përfaqësimit të shqiptarëve në institucione nuk ka sjellë rezultate, ndërsa qasja në administratë publike, polici, arsim dhe punësim mbetet e kufizuar ose mungon tërësisht. Bislimi po ashtu përmendi se raporti thekson pamjaftueshmërinë e raportimeve në gjuhët e minoriteteve në mediat publike dhe vijimin e retorikës së urrejtjes ndaj pakicave në Serbi.
Në përfundim të reagimit, ai theksoi se Kosova do të vazhdojë të ngrejë këto çështje në çdo nivel ndërkombëtar, derisa të garantohen plotësisht barazia, dinjiteti dhe të drejtat e shqiptarëve në Serbi./LUGINALAJMI/
