Kryetari i Këshillit Kombëtar Shqiptar, Enkel Rexhepi, ka zhvilluar një sërë takimesh të rëndësishme në Tiranë me përfaqësuesit më të lartë të institucioneve të Republikës së Shqipërisë. Këto takime theksojnë përkushtimin reciprok për forcimin e bashkëpunimit dhe adresimin e sfidave me të cilat përballen shqiptarët e Luginës së Preshevës.
Vizita filloi me një takim të frytshëm me ministrin për Evropën dhe Punët e Jashtme, Igli Hasani, ku u diskutuan temat më të rëndësishme që prekin drejtpërdrejt të drejtat dhe perspektivën e shqiptarëve në Luginë. Të dy palët u pajtuan për domosdoshmërinë e një bashkërendimi të vazhdueshëm ndërinstitucional dhe për rritjen e rolit të Shqipërisë në përkrahje të zhvillimit dhe përfaqësimit të drejtë të kësaj popullsie.
Më pas, z. Rexhepi u prit ngrohtësisht nga Kryetarja e Kuvendit të Shqipërisë, Elisa Spiropali. Në këtë takim u theksua nevoja për adresimin më të fuqishëm të çështjeve të pazgjidhura që rëndojnë mbi shqiptarët në Luginë, siç janë pasivizimi i adresave, diskriminimi institucional, të drejtat gjuhësore dhe mosrespektimi i marrëveshjeve të nënshkruara nga shteti serb. Znj. Spiropali shprehu gatishmërinë e saj për mbështetje të vazhdueshme institucionale dhe për vizita të afërta në terren.
Takimi përmbyllës u zhvillua me Presidentin e Republikës së Shqipërisë, Shkëlqesinë e Tij, Bajram Begaj, ku u ritheksua rëndësia e përfshirjes së çështjes së Luginës në agjendën shtetërore të Shqipërisë. Presidenti Begaj konfirmoi angazhimin e tij të palëkundur për mbrojtjen e lirive dhe të drejtave themelore të shqiptarëve në Luginë, si dhe për ruajtjen e identitetit të tyre kombëtar.
Këto takime përbëjnë një dëshmi të qartë të përkushtimit të dyanshëm për një bashkëpunim të strukturuar dhe afatgjatë mes institucioneve të Shqipërisë dhe Këshillit Kombëtar Shqiptar, në funksion të garantimit të të drejtave dhe përmirësimit të kushteve të jetës për shqiptarët në Luginën e Preshevës./LUGINALAJMI/
