Vetëm pak ditë pasi kryetari i Degës së PVD-së në Bujanoc, Ragmi Mustafi, fshiu personalisht grafitin me emrin e Ratko Mladic-it nga sheshi i qytetit, i njëjti emër është shfaqur përsëri.
Kësaj radhe, mbishkrimi “Ratko Mladic” i vendosur mes katër shkronjave “S” është shënuar në murin e një fontane tjetër në sheshin kryesor. Përveç kësaj, simbole provokuese janë lënë edhe në një prej lokaleve shqiptare që ndodhen në të njëjtin shesh.
Autorët e këtyre grafiteve deri më tani mbeten të panjohur, ndërsa reagimet kanë ardhur kryesisht nga liderët politikë dhe përfaqësuesit institucionalë shqiptarë në Bujanoc. /LUGINALAJMI/
