Në seancën plenare të Kuvendit të Serbisë, deputeti i vetëm shqiptar, Shaip Kamberi, ka deklaruar se të drejtat e pakicave nuk janë çështje simbolike, por obligime që institucionet shtetërore duhet t’i zbatojnë në praktikë.
Duke iu referuar Raportit të Komisionit Evropian, Kamberi theksoi se reformat në fushën e të drejtave të njeriut dhe të pakicave po zhvillohen me ritëm të ngadalësuar dhe se problemet strukturore vazhdojnë të prekin grupet e cenueshme. Ai përmendi zbatimin e pamjaftueshëm të ligjit për përdorimin zyrtar të gjuhës, pamundësinë e përdorimit të simboleve kombëtare dhe përfaqësimin e pamjaftueshëm të pakicave në institucionet shtetërore.
Kamberi kërkoi nga Qeveria e Serbisë që të përcaktojë afate të qarta dhe mekanizma efektivë mbikëqyrjeje për zbatimin e të drejtave të pakicave, duke theksuar se nevojiten veprime konkrete dhe jo vetëm deklarata politike.
Në fjalimin e tij, ai u ndal edhe te çështja e ndjekjes penale të krimeve të luftës, duke vlerësuar se ekzistojnë shqetësime serioze lidhur me tolerimin dhe glorifikimin e personave të dënuar për krime lufte, si dhe përparimin e kufizuar në procesin e pajtimit shoqëror.
Ai theksoi se mohimi dhe relativizimi i krimeve të luftës, përfshirë gjenocidin në Srebrenicë, dëmtojnë procesin e pajtimit dhe bien ndesh me standardet evropiane dhe sundimin e ligjit.
Duke folur për dialogun me Kosovën, Kamberi deklaroi se Serbia nuk ka përmbushur plotësisht obligimet që rrjedhin nga marrëveshjet për normalizimin e marrëdhënieve, përfshirë njohjen e diplomave, pranimin e dokumenteve dhe zbatimin e menaxhimit të integruar të kufirit. Ai vlerësoi se normalizimi i marrëdhënieve është parakusht për stabilitet dhe përparimin evropian të vendit.
Kamberi u ndal veçanërisht te kapitujt 23 dhe 24 të procesit të integrimit evropian, duke theksuar se Raporti i Komisionit Evropian konstaton përparim të kufizuar në fushën e sundimit të ligjit, pavarësisë së gjyqësorit dhe mbrojtjes së të drejtave të pakicave.
Sa i përket pozitës së shqiptarëve në Serbi, ai theksoi përfaqësimin e pamjaftueshëm në polici, gjyqësor, prokurori dhe administratë, zbatimin e paqëndrueshëm të gjuhës shqipe, si dhe praktikën e pasivizimit të adresave, e cila ndikon drejtpërdrejt në të drejtat civile dhe sociale të qytetarëve.
Në përfundim, Kamberi vlerësoi se Raporti i Komisionit Evropian paraqet një udhërrëfyes të qartë për përparim, duke kërkuar zbatim të shpejtë dhe konkret të rekomandimeve, veçanërisht në fushën e të drejtave të pakicave dhe sundimit të ligjit./LUGINALAJMI/
