Në seancën e sotme të Kuvendit të Serbisë, deputeti i vetëm shqiptar, Shaip Kamberi, ka propozuar që rendi i ditës të plotësohet me shqyrtimin e Rezolutës mbi pozitën e shqiptarëve në Luginën e Preshevës. Në fjalimin e tij para deputetëve, Kamberi theksoi se Serbia duhet të hyjë “në Evropën e të drejtave, e jo vetëm në Evropën e tregut”, duke nënvizuar se çështja e shqiptarëve në Preshevë, Bujanoc dhe Medvegjë është mbi të gjitha çështje drejtësie dhe barazie, jo politikë ditore.
Kamberi theksoi se prej më shumë se dy dekadash, dhjetëra mijëra qytetarë të Luginës jetojnë “mes ligjit dhe padrejtësisë”, ndërsa diskriminimi institucional vazhdon të mbetet realitet i përditshëm. Ai përmendi pasivizimin e adresave, moszbatimin e ligjit për përdorim zyrtar të gjuhëve, mosnjohjen e diplomave, mungesën e mbishkrimeve dygjuhëshe dhe mungesën e përfaqësimit të shqiptarëve në polici, gjyqësor dhe shërbime inspektuese, ndërkohë që rajoni vazhdon të mbetet i neglizhuar ekonomikisht.
Deputeti shqiptar theksoi se kërkesat e rezolutës nuk janë as ekstreme e as separatiste, por thellësisht evropiane dhe demokratike: barazi para ligjit, respektim të së drejtës për gjuhën shqipe, heqje të pasivizimit të adresave dhe përfaqësim të drejtë në institucionet shtetërore.
Ndër propozimet kryesore të rezolutës është krijimi i një trupi të pavarur parlamentar që, në bashkëpunim me OSBE-në dhe shoqërinë civile, do të hetojë pasojat e pasivizimit të adresave dhe do të propozojë masa për rikthimin e të drejtave të qytetarëve të prekur. Rezoluta kërkon gjithashtu njohjen e diplomave të fituara në Kosovë dhe zbatimin e plotë të gjuhës shqipe në institucionet publike.
Kamberi rikujtoi se që nga viti 2001, përmes marrëveshjeve dhe planeve të ndryshme shtetërore, Serbia është zotuar për integrimin e shqiptarëve, por në praktikë këto zotime janë shndërruar në “fjalë të vdekura”. Ai kritikoi faktin që funksionarë të Trupit Koordinues sot mohojnë edhe ekzistencën e Planit të Veprimit të vitit 2022.
Në fund të fjalimit, Kamberi u bëri thirrje deputetëve që Kuvendi të marrë përgjegjësi dhe të tregojë se shteti është garantues i të drejtave të qytetarëve të vet:
“Lugina e Preshevës nuk kërkon më shumë se barazinë. Nuk kërkon premtime të reja, por zbatimin e atyre të dhëna para 20 vjetësh. Duke mbështetur këtë Rezolutë, ne miratojmë një akt në dobi jo vetëm të shqiptarëve, por të drejtësisë, demokracisë dhe Serbisë evropiane.”/LUGINALAJMI/
