Kryetari i Këshillit Kombëtar Shqiptar (KKSH), Enkel Rexhepi, ka reaguar publikisht ndaj vendimit të Komunës së Bujanocit për ndarjen e mjeteve në kuadër të konkursit për bashkëfinancimin e projekteve mediatike për vitin 2025, duke e cilësuar atë si diskriminues ndaj mediave që informojnë në gjuhën shqipe.
Në një kërkesë zyrtare drejtuar Komunës së Bujanocit, Rexhepi ka kërkuar anulimin e këtij konkursi, duke theksuar se janë shkelur dispozitat e neneve 21 dhe 25 të Ligjit për Këshillat Kombëtare, pasi nuk është kërkuar mendimi i KKSH-së për projektet që përfshijnë prodhime në gjuhën shqipe, gjë që përbën detyrim ligjor.
“Është evidentuar mungesa e qasjes së barabartë ndaj mediave që informojnë në shqip,” – shkruan Rexhepi në postimin e tij në Facebook – “Një pjesë e konsiderueshme e fondeve është propozuar për media që nuk ushtrojnë veprimtari reale në territorin e Komunës së Bujanocit, përfshirë edhe media nga qyteti i Vranjës, ndërkohë që mediat lokale në gjuhën shqipe janë lënë anash.”
Rexhepi thekson se kjo është e papranueshme për një komunë ku mbi 62% e popullsisë janë shqiptarë, dhe përbën shkelje të parimeve të barazisë, përfaqësimit dhe të drejtës për informim në gjuhën amtare.
Ai kërkon që Komuna e Bujanocit të vendosë një praktikë të rregullt të konsultimit institucional me KKSH-në për çdo proces që lidhet me fushat ku Këshilli ka kompetenca ligjore.
“Nëse kjo kërkesë dhe detyrimet ligjore nuk respektohen, KKSH do të ndërmarrë të gjitha hapat e nevojshëm institucionalë dhe ligjorë për të mbrojtur të drejtat dhe interesat e komunitetit shqiptar në Bujanoc,” – përfundon reagimin e tij kryetari i KKSH-së.
Ky është reagimi i radhës pas kritikave të shumta nga opozita lokale, përfaqësues të shoqërisë civile dhe mediat lokale ndaj mënyrës së ndarjes së fondeve publike për mediat në Komunën e Bujanocit./LUGINALAJMI/
