Zyrtarët policorë nga Drejtoria e Njësive Speciale Intervenuese, gjatë patrullimit në magjistralen Vushtrri–Mitrovicë, kanë ndërhyrë në një rast urgjent ku një person i gjinisë femërore ishte i shtrirë në tokë dhe pa vetëdije.
Sipas njoftimit të Policisë së Kosovës, zyrtarët janë ndalur dhe kanë ofruar ndihmën e parë mjekësore, duke kontribuar në këndelljen dhe stabilizimin e gjendjes së qytetares deri në mbërritjen e ekipit mjekësor.
Policia e Kosovës vlerëson se reagimi i shpejtë dhe ofrimi i ndihmës në kohë është pjesë e përgjegjësive të zyrtarëve në terren dhe se raste të tilla tregojnë gatishmërinë dhe nivelin e trajnimit të tyre profesional, përfshirë edhe ato të realizuara me mbështetjen e partnerëve ndërkombëtarë, si Shtetet e Bashkuara të Amerikës.
Institucioni policor rithekson se angazhimi për të vepruar në situata të tilla është pjesë e përgjegjësisë ndaj qytetarëve dhe misionit të përhershëm për të siguruar rendin dhe sigurinë publike.
