Një autobus i linjës ndërkombëtare është ndaluar dje rreth orës 12:30h në hyrje të Pikëkalimit Kufitar “Dheu i Bardhë”, ku njësitë doganore, në bashkëpunim me Policinë Kufitare, kanë zbuluar sasi të konsiderueshme mallrash të fshehura brenda automjetit.
Edhe pse drejtuesit e autobusit deklaruan se nuk kishin mallra për t’u paraqitur, automjeti u selektua për kontroll të detajuar në vijën e dytë. Gjatë kontrollit, në hapësira të modifikuara dhe të kamufluara, u gjetën: 620 pako çokollata, me peshë totale 1,380 kilogramë dhe vlerë të përgjithshme mbi 10,000 euro, të gjitha të padeklaruara.
Mallrat janë konfiskuar, ndërsa ndaj palës së përfshirë është iniciuar procedura për kundërvajtje doganore, në përputhje me legjislacionin në fuqi.
Dogana e Kosovës ka njoftuar se transporti i tillë i produkteve ushqimore – të fshehura, të pakontrolluara dhe në kushte të papërshtatshme – përbën rrezik serioz për shëndetin e konsumatorëve, pasi mund të shkaktojë dëmtime, kontaminim apo mosrespektim të standardeve të sigurisë ushqimore.
Institucioni thekson se mbetet i përkushtuar në forcimin e kontrolleve kufitare, mbrojtjen e tregut dhe parandalimin e çdo forme shmangieje të detyrimeve doganore./LUGINALAJMI/
