Policia e Kosovës ka hedhur poshtë sot pretendimet e disa mediave se një grup i armatosur shqiptarësh ka shtënë ndaj pjesëtarëve të Ushtrisë së Serbisë pranë bazës “Debela Glava”. Në reagimin zyrtar, theksohet se këto pretendime janë “plotësisht të pabazuara” dhe nuk përputhen me asnjë të dhënë operative apo raport të verifikuar nga institucionet kompetente të Kosovës.
“Bazuar në të dhënat operative, raportet nga njësitë në terren dhe koordinimin me institucionet e tjera përgjegjëse, nuk është regjistruar asnjë incident i natyrës së përshkruar. Publikimi i informacioneve të pasakta kontribuon në krijimin e perceptimeve të rreme dhe rritjen e tensioneve të panevojshme në zonat kufitare”, thuhet në njoftim.
Policia e Kosovës siguron publikun se situata në zonën kufitare ka qenë dhe mbetet plotësisht e qetë dhe nën kontroll.
Në të njëjtin njoftim, Policia e Kosovës ka bërë të ditur se të dielën ka arrestuar katër shtetas të Serbisë, të cilët kishin kaluar në mënyrë të paligjshme vijën kufitare duke u thirrur në statusin e gjuetarëve, ndërsa ishin në posedim të armëve pa leje.
“Ora e gjetura dhe municioni janë sekuestruar, ndërsa të dyshuarit, me vendim të organeve të drejtësisë, janë dërguar në mbajtje sipas procedurave ligjore”, thekson Policia e Kosovës, e cila u bën thirrje mediave që të bazohen vetëm në burime të verifikuara, në mënyrë që të shmangen lajmet e rreme që mund të ndikojnë negativisht në rendin publik dhe sigurinë./LUGINALAJMI/
