Për herë të parë në qytetin e Preshevës u organizua Panairi i Librit në gjuhën shqipe, një ngjarje e veçantë që solli në qendër të vëmendjes librin dhe kulturën shqiptare. Panairi u mbajt në ambientet e Shtëpisë së Kulturës “Abdulla Krashnica” dhe u prit me entuziazëm nga qytetarët, autorët dhe botuesit nga të gjitha trevat shqiptare.
Ngjarja u organizua nga Komuna e Preshevës, në bashkëpunim me Bibliotekën “Mehmet Jusufi” dhe shtëpinë botuese “Albas”, ndërsa u mbështet financiarisht dhe institucionalisht nga Ambasada e Republikës së Shqipërisë në Beograd dhe Qeveria e Shqipërisë.
Kryetarja e Komunës së Preshevës, Ardita Sinani, ishte ndër të parët që përshëndeti këtë ngjarje përmes një postimi të gjatë në rrjetet sociale, ku shkroi:
“Presheva flet – përmes librit!
U hap me krenari Panairi i Parë i Librit Shqip në Preshevë, një ngjarje historike që vendos librin dhe gjuhën shqipe në qendër të vëmendjes kulturore të qytetit tonë.
Ky panair është rezultat i një bashkëpunimi të ngushtë me Ambasadën e Shqipërisë në Beograd, të cilën e falënderojmë sinqerisht, veçanërisht ambasadorin Bardhyl Canaj, për përkushtimin e tij ndaj shqiptarëve të Luginës.”
Ajo kujtoi se kjo ide ishte iniciuar që në vitin 2021 si projekt i përbashkët me Qeverinë e Shqipërisë dhe tashmë u realizua me sukses.
Pas këtij postimi dhe zhvillimeve në Preshevë, edhe Kryeministri i Shqipërisë, Edi Rama, ka reaguar përmes një postimi në Facebook ku shkruan:
“Panairi i Parë i Librit Shqip në Preshevë, falë mbështetjes së Qeverisë Shqiptare
Së shpejti, një tjetër marrëveshje bashkëpunimi enkas për Preshevën, që do të mundësojë projekte e programe shkëmbimi profesionale, ture e eksperienca krijuese, mbështetje teknike e promovim traditash, arti, kulture e trashëgimie.”
Në këtë panair dyditor morën pjesë botues dhe autorë nga Shqipëria, Kosova, Maqedonia e Veriut dhe diaspora, si dhe personalitete të kulturës, arsimit dhe medias. U organizuan promovime librash, panele diskutimi, orë letrare për fëmijë dhe aktivitete që sollën frymën kombëtare në qendër të Preshevës.
Panairi është vlerësuar si fillimi i një tradite të re kulturore në Luginë, me synimin që të bëhet një festë vjetore e mendjes dhe librit shqip në Preshevë./LUGINALAJMI/
