-Foto ilustrim-
Presidentja e Republikës së Kosovës, Vjosa Osmani, ka njoftuar sot se ka mandatuar nënkryetarin e Lëvizjes Vetëvendosje, Glauk Konjufcën, për formimin e Qeverisë së re të vendit.
Në një konferencë për media të mbajtur të martën, presidentja Osmani theksoi se vendimi vjen pas konsultimeve të nevojshme dhe në përputhje me dispozitat kushtetuese për formimin e ekzekutivit.
Paraprakisht, Këshilli i Përgjithshëm i Lëvizjes Vetëvendosje kishte marrë vendim që Glauk Konjufca të jetë mandatar për krijimin e Qeverisë së re, duke i dhënë atij mbështetjen e plotë politike të subjektit.
Me këtë hap, procesi i formimit të institucioneve të reja pritet të hyjë në fazën e negociatave për përbërjen e kabinetit qeveritar dhe sigurimin e shumicës parlamentare./LUGINALAJMI/
