Ish-kryetari i Kuvendit Komunal të Bujanocit dhe këshilltari i PVD-së, Enver Ramadani, ka zhvilluar një takim me ambasadorin e Kosovës në Beograd, Jetish Jashari. Takimi është mbajtur dje dhe, sipas Ramadanit, ka qenë një mundësi për të thelluar bashkëpunimin dhe për të diskutuar për situatën e shqiptarëve në Luginën e Preshevës.
“Një takim miqësor me Ambasadorin e Republikës së Kosovës në Beograd, z. Jetish Jashari. Gjithmonë i gatshëm për bashkëbisedim dhe për të përcjellë interesimin e Qeverisë së Kosovës për gjendjen e shqiptarëve në Luginën e Preshevës. Faleminderit për përkrahjen dhe bashkëpunimin e vazhdueshëm!”, ka shkruar Ramadani pas takimit. Takimi vjen në një periudhë kur përfaqësues të institucioneve të Kosovës po shfaqin interes të shtuar për zhvillimet politike dhe institucionale në Luginë, ndërsa bashkërendimi ndërmjet përfaqësuesve lokalë dhe diplomacisë kosovare po shihet si i domosdoshëm për avancimin e pozitës së shqiptarëve në Luginë të Preshevës./LUGINALAJMI/
