Policia serbe ka ndërhyrë herët në mëngjesin e së mërkurës për të shpërndarë studentët që po mbanin një bllokadë përpara hyrjeve të ndërtesës së Radio-Televizionit të Serbisë (RTS) në Beograd. Siç raporton Radio Evropa e Lirë në gjuhën serbe, para studentëve janë vendosur kordonë të policisë dhe njësive të xhandarmërisë.
Sipas njërit prej renditësve të protestës, punonjësit e RTS-së kanë hyrë në ndërtesë rreth orës 05:00 të mëngjesit me përcjellje të policisë. Si reagim ndaj kësaj ndërhyrjeje, studentët kanë vendosur të qëndrojnë përballë kordonit policor.
Rrugët përreth RTS-së janë aktualisht të bllokuara, ndërsa atmosfera në terren mbetet e tensionuar, por pa përplasje serioze. Përveç disa shtytjeve sporadike mes policisë dhe protestuesve, deri më tani nuk raportohet për incidente të rënda.
Protesta e studentëve ka nisur të hënën në mbrëmje, si shenjë kundërshtimi ndaj politikave të mediave publike dhe trajtimit të çështjeve të ndjeshme nga RTS. Ndërkohë, policia dhe xhandarmëria kanë ndërhyrë gjithashtu në orët e para të mëngjesit për të ndërprerë një bllokadë të ngjashme në ndërtesën e Radio Televizionit të Vojvodinës, në Novi Sad./LUGINALAJMI/
