Deputeti i vetëm shqiptar në Kuvendin e Serbisë, Shaip Kamberi, ka marrë një përgjigje zyrtare nga Presidenti i Këshillit Evropian, António Costa, lidhur me çështjen e pasivizimit të adresave në komunat me shumicë shqiptare në jug të Serbisë.
Letra, e nënshkruar nga Pedro Lourtie, shefi i kabinetit të Presidentit Costa, është dërguar më 18 korrik 2025 dhe përfaqëson një ndër reagimet më të qarta institucionale të Bashkimit Evropian ndaj këtij problemi. Në të theksohet se Bashkimi Evropian është i vetëdijshëm për pasojat që ka kjo praktikë dhe se çështja është përfshirë edhe në raportet e zgjerimit për Serbinë.
“Bashkimi Evropian do të vazhdojë t’u kërkojë autoriteteve serbe që të ofrojnë sqarime më të qarta për publikun lidhur me mënyrën se si kryhen verifikimet e statusit të vendbanimit,” thuhet në letrën drejtuar Kamberit.
Në dokument përkujtohet se Serbia, si shtet kandidat për anëtarësim në BE, duhet të harmonizojë kuadrin e saj ligjor për të drejtat e pakicave me standardet ndërkombëtare dhe evropiane.
Shaip Kamberi e ka vlerësuar këtë përgjigje si një hap të rëndësishëm drejt ndërkombëtarizimit të problemit të pasivizimit të adresave, duke theksuar se kjo praktikë ka pasoja të rënda për shqiptarët dhe po përdoret si mjet për ndryshim të qëllimshëm të përbërjes etnike në Medvegjë, Bujanoc dhe Preshevë.
Reagimi i Këshillit Evropian vjen në një moment kur rritet presioni nga organizatat ndërkombëtare të të drejtave të njeriut që kjo praktikë diskriminuese të ndalet dhe të realizohet një hetim i pavarur ndërkombëtar mbi përmasat dhe ndikimet e saj në jetën e përditshme të qytetarëve shqiptarë në jug të Serbisë./LUGINALAJMI/
