Delegacioni nga Lugina e Preshevës, i udhëhequr nga deputeti Shaip Kamberi, ka zhvilluar një takim të rëndësishëm në Uashington me kongresmenin Keith Self, kryetar i Nënkomisionit për Evropën në Komitetin për Punë të Jashtme të Dhomës së Përfaqësuesve të SHBA-së dhe një nga aleatët më të afërt të ish-presidentit Donald Trump në Kongresin Amerikan.
Vetëm pak orë pas takimit me delegacionin shqiptar nga Lugina, Donald Trump publikoi në rrjetin e tij social një deklaratë të fuqishme publike në mbështetje të kongresmenit Self, duke e cilësuar atë si “një mbrojtës të madh të Amerikës, të sigurisë dhe të kufijve”, dhe duke i dhënë mbështetjen e tij të plotë për rizgjedhje në Kongres.
Në postimin e tij, Trump shkroi ndër të tjera:
“Kongresmeni Keith Self është një avokat i jashtëzakonshëm për popullin e madh të Teksasit. Si i diplomuar në West Point dhe ish-ushtar i Forcave Speciale, ai e njeh urtësinë dhe guximin e nevojshëm për të mbrojtur vendin tonë, për të mbështetur ushtrinë dhe veteranët tanë, dhe për të siguruar paqen përmes forcës. Në Kongres, ai po punon për të mbajtur kufijtë tanë të sigurt, për të ndalur krimin e migrantëve, për të ulur taksat, për të nxitur energjinë amerikane dhe për të mbrojtur Amendamentin e Dytë.”
Në fund të deklaratës, Trump shtoi se Keith Self ka “mbështetjen e tij të plotë dhe të pakushtëzuar për rizgjedhje” duke theksuar se “ai nuk do t’i zhgënjejë kurrë qytetarët”.
Takimi i delegacionit të Luginës së Preshevës me një nga figurat më të afërta të Presidentit Trump shihet si një sinjal pozitiv që çështjet e shqiptarëve në jug të Serbisë po marrin gjithnjë e më shumë vëmendje në qarqet e larta të politikës amerikane./LUGINALAJMI/
