Tri ngjarje të ndodhura brenda një harku kohor prej vetëm dhjetë ditësh në Luginën e Preshevës kanë ngjallur shqetësim të thellë në mesin e shqiptarëve të kësaj treve dhe mund të ndikojnë në përshkallëzimin e situatës. Këshilltari për çështje të pakicave pranë Presidencës së Kosovës, Zijush Ahmeti, ka reaguar përmes një postimi në Facebook duke i cilësuar këto si akte të planifikuara dhe thellësisht provokuese. Sipas tij, rasti i parë është heqja e flamurit kombëtar shqiptar nga shtiza në Lapidarin e martirëve në fshatin Gruhali, një veprim i cili ka prekur ndjenjat kombëtare të banorëve shqiptarë. Rasti i dytë është vandalizimi i bilbordit me portretin e Komandant Lleshit në qytetin e Bujanocit, një akt që synon fshirjen e simboleve të rezistencës dhe identitetit historik të shqiptarëve në këtë rajon. Ndërsa rasti i tretë ka ndodhur në fshatin Zhunicë, ku persona të paidentifikuar dhe pa asnjë paralajmërim kanë vendosur flamurin serb në objektin e shkollës fillore, në një vendbanim me shumicë absolute shqiptare dhe ku nuk ka asnjë nxënës serb. Ahmeti ka theksuar se këto veprime janë qëllimkëqija dhe mund të pasohet me akte të tjera në ditët në vijim, por ka bërë thirrje që shqiptarët të mos bien pre e provokimeve, por të qëndrojnë të bashkuar në mbrojtje të identitetit dhe dinjitetit të tyre. Ai ka përfunduar duke theksuar se përballë këtyre provokimeve, është e domosdoshme maturia, vendosmëria dhe uniteti qytetar./LUGINALAJMI/
