Zëvendësministrja për Kulturë, Rini dhe Sport në Qeverinë e Kosovës, Daulina Osmani, ka vizituar sot Komunën e Preshevës, ku ka zhvilluar takime me kryetaren e Preshevës, Ardita Sinani. Ky takim kishte për qëllim diskutimin mbi projektet që priten të mbështeten nga Qeveria e Kosovës në këtë komunë.
Kryetarja Sinani njoftoi për natyrën e këtij takimi dhe projekteve që do të përfitojnë mbështetje. Ajo theksoi se bashkëpunimi për zhvillimin kulturor, rinor dhe sportiv në Preshevë është më i fortë se kurrë, falë angazhimit të Zëvendësministres Osmani.
Në postimin e saj, Sinani shprehu kënaqësinë që pati mundësinë të mirëpresë Znj. Osmani dhe të shoqërojë atë gjatë një vizite në terren, ku u diskutuan disa projekte konkrete. Pikat kryesore të diskutimit përfshijnë:
- Lokacioni për ndërtimin e Sallës së Sportit, një hapësirë multifunksionale që do të shërbejë si qendër për aktivitete sportive dhe kulturore për të rinjtë e Preshevës. Ky projekt është një prioritet i komunës për përmirësimin e infrastrukturës sportive dhe ofrimin e mundësive të reja për rininë.
- Ndërtimi i Muzeut të Trashëgimisë Kulturore, një projekt që synon ruajtjen dhe promovimin e historisë dhe traditës lokale, duke ofruar Preshevës një simbol të identitetit të saj unik.
- Rigjallërimi i Çarshisë së Vjetër dhe shtëpive historike, me qëllim kthimin e këtyre hapësirave në qendra të jetës kulturore dhe ekonomike të qytetit, si pjesë e një angazhimi të pandashëm për ruajtjen dhe promovimin e trashëgimisë kulturore.
Kryetarja Sinani theksoi se kjo vizitë ishte një mundësi e shkëlqyer për të diskutuar sfidat dhe mundësitë që ka para vetes Komuna e Preshevës, si dhe angazhimin e përbashkët për të kthyer këto ide në realitet. Ajo shprehu falënderime për Znj. Osmani për përkushtimin dhe gatishmërinë e saj për të mbështetur këtë rrugëtim./LUGINALAJMI/
