Partia për Veprim Demokratik (PVD), partia e parë politike shqiptare dhe më e madhja në Luginën e Preshevës, ka shënuar më 19 gusht 36-vjetorin e themelimit.
Me këtë rast, kryetari i PVD-së, Shaip Kamberi, përmes një postimi në Facebook ka uruar anëtarët dhe simpatizantët e partisë, duke rikujtuar rrugëtimin e saj që nga themelimi më 19 gusht 1990.
“36 vite janë një kohë e gjatë në jetën e një njeriu, por edhe një kapitull i rëndësishëm në historinë politike të një populli”, ka shkruar Kamberi.
Ai ka theksuar se gjatë këtyre viteve PVD ka kaluar nëpër periudha të vështira, presione dhe kriza politike, ka qeverisur dhe ka qenë në opozitë në nivel lokal, ndërsa ka vazhduar përfaqësimin politik të shqiptarëve edhe në Parlamentin e Serbisë.
Sipas Kamberit, megjithatë, shumë nga objektivat për të cilat është themeluar PVD mbeten ende të parealizuara. Në këtë drejtim ai ka përmendur diskriminimin institucional, përfaqësimin e pamjaftueshëm të shqiptarëve në institucionet shtetërore, zhvillimin e pabarabartë ekonomik, problemet në arsim dhe përdorimin e gjuhës shqipe, pasivizimin e adresave dhe largimin e të rinjve.
Kamberi ka paralajmëruar një fazë të re për PVD-në, të cilën e ka përmbledhur me mesazhin: “Nga rezistenca në transformim. Nga mbijetesa në barazi. Nga përfaqësimi në rezultate”.
Ai ka kërkuar gjithashtu forcimin e bashkëpunimit dhe koordinimit politik me Kosovën dhe Shqipërinë, si dhe intensifikimin e ndërkombëtarizimit të çështjes së shqiptarëve të Luginës së Preshevës.
Sipas tij, zëri i shqiptarëve të Luginës duhet të dëgjohet edhe në kuadër të dialogut Kosovë–Serbi, duke kërkuar respektimin e të drejtave të tyre mbi parimin e barazisë.
Në mesazhin e tij, Kamberi ka falënderuar kryetarin e parë të PVD-së, Riza Halimin, themeluesit, përfaqësuesit, aktivistët dhe votuesit që kanë kontribuar në parti gjatë 36 viteve.
“Faza e parë ishte mbijetesa. Faza e dytë është barazia. Faza e tretë është zhvillimi”, ka përfunduar Kamberi./LUGINALAJMI/
