Deputeti shqiptar në Kuvendin e Serbisë dhe kryetari i Partisë për Veprim Demokratik, Shaip Kamberi, po qëndron për vizitë zyrtare në Uashington.
Gjatë kësaj vizite, Kamberi ka marrë pjesë në Mëngjesin e Lutjeve, një ngjarje tradicionale ku marrin pjesë mijëra të ftuar nga mbarë bota, përfshirë përfaqësues politikë, diplomatë dhe personalitete të jetës publike.
Në kuadër të qëndrimit në SHBA, Kamberi ka vizituar edhe Ambasadën e Republikës së Kosovës në Uashington, ku është pritur nga ambasadori Ilir Dugolli. Në të njëjtën vizitë në ambasadë kanë qenë edhe kryetari i Aleancës për Ardhmërinë e Kosovës, Ramush Haradinaj, si dhe kryetari i Gjykatës Kushtetuese të Republikës së Kosovës, Nexhmi Rexhepi.
Ambasada e Kosovës në SHBA ka njoftuar në faqen e saj zyrtare se ambasadori Dugolli kishte kënaqësinë të mirëpriste në ambasadë Kryetarin e Gjykatës Kushtetuese Nexhmi Rexhepi, ish-kryeministrin Ramush Haradinaj dhe deputetin Shaip Kamberi, të cilët ndodhen në Uashington, D.C., për të marrë pjesë në Mëngjesin e Lutjeve./LUGINALAJMI/
