Edhe këtë verë, Asociacioni Qytetar “Bujanoci” me seli në Zvicër do të organizojë tubimin tradicional veror në oborrin e Shkollës Fillore “Naim Frashëri” në Bujanoc, duke mbledhur bashkatdhetarët nga diaspora dhe qytetarët e vendlindjes.
Në kuadër të projektit veror “Youth Meet Up”, Asociacioni ka njoftuar se të shtunën, më 1 gusht 2026, do të organizohet Dita Sportive, e cila do të zhvillohet nga ora 16:30 deri në 21:30 në oborrin e Shkollës Fillore “Naim Frashëri”.
Sipas organizatorëve, aktiviteti synon të krijojë një atmosferë sportive, festive dhe miqësore, duke forcuar lidhjet mes diasporës dhe qytetarëve të Bujanocit.
Pjesëmarrjen në këtë ngjarje e kanë konfirmuar disa nga klubet sportive të qytetit, ndër to KF Besa, KB Elita, KK Besa, KV Flaka, Lugina Bike, si dhe klube të tjera.
Organizatorët kanë ftuar të gjithë qytetarët, pa dallim moshe apo gjinie, të bëhen pjesë e kësaj dite të veçantë, me synimin për të promovuar sportin, bashkëpunimin dhe dashurinë për vendlindjen.
“Nëse je Bujanocali, mos mungo! Të presim më 1 gusht në Bujanoc”, thuhet në ftesën e Asociacionit Qytetar “Bujanoci” – Zvicër./LUGINALAJMI/
