Dhjetëra qytetarë të Tërnocit u mblodhën sonte në ambientet e Bashkësisë Lokale për të nderuar jetën dhe veprën e veprimtarit të njohur të diasporës, Skender Jusufi, i cili ndërroi jetë dje në Zvicër.
Në njoftimin e Bashkësisë Lokale të Tërnocit thuhet se mbledhja komemorative u organizua në shenjë respekti për një veprimtar të palodhur, humanist dhe patriot, i cili gjithë jetën ia kushtoi vendlindjes dhe bashkëatdhetarëve të tij. Kontributi i Skender Jusufit për Tërnocin ishte i vazhdueshëm dhe i sinqertë – sa herë që fshati kishte nevojë, ai ishte aty, bashkë me shokët e tij, për të ndihmuar.
“Me vdekjen e tij nuk vdesin as punët e as veprat. Ato do të jetojnë në mesin tonë, ashtu siç do të jetojë edhe vetë Skenderi përmes kontributit dhe veprës së tij”, thuhet mes tjerash në njoftim.
Skender Jusufi ishte bashkëthemelues dhe ish-kryetar i Lëvizjes së Mërgimtarëve të Tërnocit (LMT), në disa mandate, duke organizuar aktivitete kulturore, sportive dhe duke kontribuar vazhdimisht për zhvillimin e vendlindjes.
Ai lindi më 10 qershor 1955 në Tërnoc, ku përfundoi shkollën fillore, ndërsa gjimnazin e kreu në Bujanoc. Studimet universitare i përfundoi në Fakultetin Juridik të Universitetit të Prishtinës. Që nga viti 1981 jetoi dhe veproi në Zvicër, ku u arsimua dhe u specializua më tej në fushën e ndërtimit dhe teknologjisë.
Në vitin 1994 themeloi kompaninë “Ing. Büro Jusufi” në Oftringen, me të cilën realizoi disa projekte ndërtimore në Zvicër. Përveç veprimtarisë profesionale, për shumë vite ishte këshilltar juridik dhe përkthyes për bashkatdhetarët, si dhe aktiv në strukturat e shoqatave shqiptare në Zvicër.
Edhe pas pensionimit, Skender Jusufi mbeti i angazhuar në shërbim të mërgatës dhe çështjes kombëtare, duke lënë pas një trashëgimi të çmuar njerëzore dhe shoqërore.
Lavdi jetës dhe veprës së Skender Jusufit. I lehtë i qoftë dheu i Tërnocit./LUGINALAJMI/
