Kryetari i parë shqiptar i Komunës së Bujanocit, Nagip Arifi, sot feston 65-vjetorin e lindjes, ditë që njëkohësisht shënon edhe daljen e tij në pension.
Me këtë rast, një nga bashkëpunëtorët e tij të afërt, Sali Salihi, përmes një postimi ka uruar ish-kryetarin e Komunës së Bujanocit dhe kryetarin e Partisë Demokratike.
„Urime ditëlindjen dhe pensionimin, Kryetar!
Të uroj nga zemra shëndet, jetë të gjatë dhe shumë momente të bukura pranë familjes dhe njerëzve të dashur.
Përvoja, urtësia dhe kontributi yt mbeten të çmuara dhe gjithmonë të nevojshme.
Uroj që vitet që vijnë të sjellin edhe më shumë forcë, energji dhe mundësi për të vazhduar të kontribuosh aty ku përvoja dhe fjala jote kanë peshë.
Edhe shumë vite të lumtura, Kryetar!”, ka shkruar Salihi.
Ndryshe, Nagip Arifi është prej vitesh pjesë e jetës politike në Bujanoc dhe kryetar i Partisë Demokratike (PD). Ai ka ushtruar disa herë funksionin e kryetarit të Komunës së Bujanocit dhe njihet si shqiptari i parë që ka drejtuar këtë komunë.
Gjatë angazhimit të tij politik ka mbajtur funksione të ndryshme në nivel lokal dhe ka qenë pjesë e zhvillimeve politike në Bujanoc për më shumë se dy dekada. Arifi vazhdon të jetë kryetar i Partisë Demokratike./LUGINALAJMI/
