Ministri i Punëve të Jashtme i Serbisë, Marko Gjuriq, ka bërë të ditur se Serbia dhe Shqipëria kanë arritur një marrëveshje në parim për hapjen e konsullatave në Shkodër dhe në Bujanoc.
Në një intervistë për Radio Beogradin, Gjuriq tha se gjatë takimit me ministrin e ri të Punëve të Jashtme të Shqipërisë, Ferit Hoxha, është arritur pajtueshmëri fillestare për këtë hap diplomatik.
“Më gëzon që pata bisedime të mira me ministrin e ri të Jashtëm të Shqipërisë, Ferit Hoxha, me të cilin arritëm pajtim në parim që të hapim konsullatat e dy vendeve tona në Shkodër dhe në Bujanoc”, deklaroi Gjuriq, shkruan Danas.rs
Duke folur për integrimin evropian, ai theksoi se Serbia ka përshpejtuar zbatimin e reformave të kërkuara nga Bashkimi Evropian dhe se anëtarësimi në BE mbetet interes kombëtar i vendit.
Sipas tij, Serbia është e lidhur ngushtë me Bashkimin Evropian si në aspektin ekonomik, ashtu edhe në atë të sigurisë, duke shtuar se është më mirë që vendi të marrë pjesë në vendimmarrje sesa të jetë vetëm objekt i saj.
Gjuriq foli edhe për marrëdhëniet me Republikën Çeke, duke vlerësuar se Serbia ka një partner të rëndësishëm në Evropën Qendrore. Ai tha se gjatë vizitës së tij në Pragë, ministri i Jashtëm çek, Petr Maçenka, kishte deklaruar se njohja e Kosovës nga disa qeveri të mëparshme çeke ishte bërë nën presion dhe se çështja e Kosovës është, sipas tij, “një çështje serbe”.
Sa i përket situatës në Kosovë, Gjuriq vlerësoi se Qeveria e Kosovës është gjithnjë e më e izoluar në bashkësinë ndërkombëtare.
Në intervistë, ai komentoi edhe rastin e ndërtesës së ish-Shtabit të Përgjithshëm të Ushtrisë në Beograd, duke mbrojtur ministrin e Kulturës, Nikola Selakoviq. Sipas Gjuriqit, Selakoviqi ka vepruar në përputhje me ligjin dhe në interes të shtetit, ndërsa akuzat ndaj tij dhe disa zyrtarëve të tjerë i cilësoi si sulme ndaj interesave shtetërore dhe kombëtare./LUGINALAJMI/
