Deputeti i vetëm shqiptar në Parlamentin e Serbisë, Shaip Kamberi, nëpërmjet një postimi në “Facebook” të enjten, ka njofuar se ka iniciuar një rezolutë në legjislativin serb që kërkon të dënohet gjenocidi në Srebrenicë – rajon në lindje të Bosnje dhe Hercegovinës, ku forcat ushtarake serbe vranë e masakruan mbi 8 mijë burra dhe djem boshnjakë myslimanë në vitin 1995.
Kjo inciativë e përbashkët, nënshkues të së cilës janë edhe dy deputetë boshnjakë nga rajoni i Sanxhakut në Serbi – Ahmedin Shkrijel dhe Selma Kuçeviç – erdhi si rezultat i rezolutës së Organizatës së Kombeve të Bashkuara (SHBA) që u miratua më 23 maj 2024, që e shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.
“Por, meqë negacioni [mohimi] i gjenocidit dhe krimeve të luftës është shndrruar në kulturë të politikës shtetërore në Serbi, nuk mund të pritet që ajo të përkrahet nga shumica në kuvendin popullor. Sidoqoftë, inciativa ka për qëllim të dëshmojë se ekzistojë forca politike që kundërshtojnë politikën zyrtare të negacionit të krimeve të luftës dhe gjenocidit”, ka shtuar ai.
Kosova ka shpallur po ashtu 11 korrikun si Ditë të Përkujtimit të Viktimave të Gjenocidit në Srebrenicë. E për gjenocidin e kryer, deri më tash, janë dënuar më shumë se 50 persona me rreth 700 vjet burg. Gjenocidi në Srebrenicë – një ndër ngjarjet më të rënda në Evropë pas Luftës së Dytë Botërore – vazhdon të mohohet nga autoritetet në Serbi dhe Republikën Srpska.
