Qeveria e Kosovës, përmes Këshillit Kombëtar Shqiptar (KKSH), ka shpallur një konkurs për subvencionimin e bujqve shqiptarë nga Presheva, Bujanoci dhe Medvegja. Ky konkurs, i mbështetur me një fond prej 1 milion eurosh, ka tërhequr një interes të jashtëzakonshëm nga bujqit e këtyre zonave. Kjo shumë është shumë herë më e lartë krahasuar me fondet e shpallura për konkurset nga administratat komunale në Bujanoc dhe Preshevë.
Megjithatë, është për t’u habitur fakti që deri tani janë regjistruar rreth 1 mijë aplikues, një numër shumë i madh në krahasim me numrin e bujqve që ushtrojnë aktivitetin bujqësor në këto dy komuna me shumicë shqiptare. Kjo ngrit pyetje mbi efektivitetin e këtij programi dhe mënyrën se si do të shpërndahen fondet e dedikuara për këtë kategori dhe cili do të jetë kriteri.
Për më tepër, ka shqetësime se, gjatë dy viteve të fundit, fondet e Qeverisë së Kosovës nuk janë shfrytëzuar në plotni, duke lënë miliona euro të papërdorura. Ky fakt ka krijuar një përshtypje se konkursi i shpallur tani mund të shfrytëzohet për qëllime politike, duke favorizuar mbështetësit e caktuar, dhe jo bujqit, blegtorët dhe bletarët e vërtetë, që në mënyrë të sinqertë ushtrojnë aktivitetin e tyre.
Nëse ky trend vazhdon, ky konkurs mund të mbetet vetëm një masë për të krijuar iluzionin e mbështetjes për bujqësinë, pa siguruar përfitime reale për ata që e ushtrojnë këtë profesion në mënyrë profesionale./LUGINALAJMI/
