Pikëkalimi kufitar lokal në Dobrosin, që lidh Serbinë me Kosovën, është bllokuar sërish nga Policia e Kosovës, pa ndonjë njoftim paraprak. Kjo situatë ka shkaktuar pakënaqësi tek qytetarët e komunës së Bujanocit, veçanërisht në këtë periudhë festash, kur fluksi i lëvizjeve drejt Kosovës është i madh. Sipas dëshmive të qytetarëve, askush nuk po lejohet të kalojë me automjete nga Serbia drejt Kosovës përmes këtij kalimi. Një qytetar nga Bujanoci ka reaguar ashpër ndaj kësaj mase, duke e parë atë si një pengesë të pajustifikuar për lëvizjen e lirë.
“Kolonat e mdha per kosov per festen a Bajramit policija kosoves blindon rrugen asni kerr nuk lejon te hyn ne pograxh e Miresh ajemi ni komb a po qka kan kto” – ka shkruar qytetari R.I. në origjinalitet.
Ky nuk është rasti i parë kur ky pikëkalim mbyllet papritmas nga autoritetet kosovare. Edhe më herët, Policia e Kosovës ka ndërmarrë masa të ngjashme, duke kërkuar që qytetarët të përdorin vetëm pikën kufitare të “Dheut të Bardhë”. Por mbetet e paqartë nëse këto veprime kanë bazë të fortë sigurie apo nëse janë vendime administrative të njëanshme, që krijojnë vështirësi për banorët e zonës. Një qasje më transparente dhe komunikim më i qartë me qytetarët do të ndihmonte në shmangien e keqkuptimeve dhe tensioneve, veçanërisht në raste të tilla kur kufizimet prekin drejtpërdrejt jetën e përditshme të qytetarëve të dy anëve të kufirit./LUGINALAJMI/
