Qeveria e Republikës së Kosovës ka miratuar sot një vendim të rëndësishëm me vlerë 626,400 euro në mbështetje të Këshillit Kombëtar Shqiptar, si pjesë e angazhimit të saj për avancimin e të drejtave të shqiptarëve në Preshevë, Bujanoc dhe Medvegjë.
Vendimi përfshin mbështetje të drejtpërdrejtë për arsimin dhe avokimin institucional, duke synuar forcimin e pozitës së shqiptarëve në jug të Serbisë dhe rritjen e pranisë së tyre në tryezat vendimmarrëse ndërkombëtare.
Sipas Ragmi Mustafit, këshilltar i zëvendëskryeministrit të parë të Kosovës, Besnik Bislimi, kjo ndihmë është konkrete dhe gjithëpërfshirëse:
- 756 studentë shqiptarë nga 32 vendbanime janë përfshirë në programin e bursave.
– 407 prej tyre studiojnë në Prishtinë,
– 110 në Tiranë,
– dhjetëra të tjerë në Shkup, Tetovë, Turqi dhe në vendet e BE-së.
Këta studentë ndjekin 56 drejtime studimi në 17 qytete të ndryshme, me një vizion të përbashkët: dije për të qëndruar, arsim për të mbijetuar, shkollim për të mos u përkulur. - Po ashtu, 97 fëmijë pa prindër ose me vetëm një prind janë përfshirë në mbështetje direkte, duke vënë në fokus më të pambrojturit si prioritet të kujdesit institucional.
- Një pjesë e mjeteve janë dedikuar për lobim dhe avokim ndërkombëtar, që zëri i shqiptarëve të Luginës të dëgjohet në instancat relevante evropiane dhe më gjerë.
“Ky vendim nuk është vetëm një dokument financiar,” – thekson Ragmi Mustafi – “por një akt politik dhe kombëtar. Është investim në dinjitet, dije dhe barazi, një angazhim i shtetit që ndjen përgjegjësi për bashkëkombësit përtej kufijve administrativë.”
Në fund të reagimit të tij, Mustafi shprehu mirënjohje të thellë për kryeministrin Albin Kurti, zëvendëskryeministrin Besnik Bislimi dhe të gjithë kabinetin qeveritar që, siç u shpreh ai, “e shohin Luginën jo si periferi, por si pjesë të pandashme të hartës së përgjegjësisë kombëtare”./LUGINALAJMI/
