-Foto ilustrim-
Policia në Bujanoc ka arrestuar V. A. (23), nga rrethina e këtij qyteti, nën dyshimin se më 11 tetor, pas përfundimit të ndeshjes së futbollit midis përfaqësueses së Serbisë dhe Republikës së Shqipërisë, ka qëlluar me armë nga një veturë në lëvizje.
Sipas njoftimit të Drejtorisë së Policisë në Vranjë, i riu dyshohet për kryerjen e veprës penale të shkaktimit të rrezikut të përgjithshëm.
“Me urdhër të prokurorit kujdestar të Prokurorisë Themelore Publike në Vranjë, të dyshuarit i është caktuar masa e ndalimit prej 48 orësh. Pas përfundimit të afatit ligjor, ai do t’i dorëzohet prokurorisë së bashku me kallëzimin penal. Policia po vazhdon punën në ndriçimin e plotë të rastit,” thuhet në njoftimin zyrtar të policisë./LUGINALAJMI/
