E propozuar për anëtare të Trupit Rregullator për Mediat Elektronike (REM) nga Këshilli Kombëtar Shqiptar, gazetarja Lumturije Limani Ameti ka njoftuar mbrëmë përmes portalit serb Bujanovačke se është tërhequr nga gara për anëtarësim në këtë institucion të rëndësishëm shtetëror.
Në deklaratën e saj publike, Limani Ameti thekson se vendimi për tërheqje vjen si pasojë e një procesi të paqartë dhe të zvarritur, të shoqëruar me mungesë transparence dhe pasiguri institucionale, si dhe për shkak të mungesës së mbështetjes së plotë dhe konsensuale nga këshillat kombëtarë të pakicave në Serbi. Ajo vlerëson se pa një mbështetje të tillë, përfaqësimi i interesave të pakicave kombëtare në REM nuk mund të jetë as i plotë dhe as kredibil.
Ndërkohë, reagimi i Këshillit Kombëtar Shqiptar, përkatësisht i kryetarit të tij Enkel Rexhepi, ishte kryesisht distancues. Ai e cilësoi tërheqjen si një vendim personal të kandidates dhe shprehu keqardhje për, siç u tha, humbjen e një “rasti historik” që shqiptarët të kishin përfaqësuesin e tyre në këtë organ rregullator.
Në këtë kontekst, largimi i Lumturije Limani Ametit nga gara për anëtare të REM-it vështirë se mund të trajtohet vetëm si një vendim individual. Ky zhvillim i faturohet Këshillit Kombëtar Shqiptar si një dështim i radhës në menaxhimin e proceseve të rëndësishme institucionale. Rasti në fjalë i shtohet një sërë dështimesh që kanë shoqëruar këtë përbërje të KKSH-së gjatë mandatit të fundit, veçanërisht në situata kur janë hapur mundësi reale për përfaqësim institucional të shqiptarëve në organet kyçe të shtetit, pa arritur që ato të konkretizohen në rezultate konkrete./LUGINALAJMI/
