Katër shtetas të Republikës së Shqipërisë janë arrestuar në territorin e Serbisë nën dyshimin për kryerjen e veprës penale “nxitje e urrejtjes dhe intolerancës nacionale, racore dhe fetare”.
Siç shkruan Kurir.rs, bëhet fjalë për personat me iniciale A. S. (1989), E. V. (1984), E. G. (1978) dhe A. C. (2005), të cilët janë ndaluar nga pjesëtarët e Ministrisë së Punëve të Brendshme, konkretisht nga Drejtoria e Policisë Kriminale.
Sipas dyshimeve të autoriteteve, njëri nga të arrestuarit, A. S., në ditën e shënimit të fillimit të bombardimeve të NATO-s, ka publikuar në rrjetin social Facebook një video ku shihet duke udhëtuar me një veturë së bashku me personat e tjerë.
Në video, sipas pretendimeve të organeve të rendit, ata shfaqin simbole që lidhen me idenë e “Shqipërisë së Madhe” dhe përdorin shprehje të papërshtatshme në kontekst negativ ndaj Republikës së Serbisë.
Po sipas të njëjtit burim, të dyshuarve u është caktuar masa e ndalimit deri në 48 orë, pas së cilës pritet që, së bashku me kallëzimin penal, të dërgohen në Prokurorinë e Lartë Publike në Beograd – Departamenti i Posaçëm për luftimin e krimit të teknologjisë së lartë.
Autoritetet nuk kanë dhënë ende detaje shtesë mbi rrjedhën e mëtejshme të procedurës, ndërsa rasti mbetet në fazën e hetimeve./LUGINALAJMI/
