Në mbledhjen e djeshme të Këshillit Bashkiak të Tiranës u votua edhe kërkesa për financimin e projektit për Komunën e Bujanocit.
Bëhet fjalë për projektit e ndërtimit të sallës së sporteve në shkollën fillore “Naim Frashëri” në Bujanoc, për të cilin javë më parë u dakorduan, kryebashkiaku i Tiranës, Erijon Veliaj dhe kryetari i Kuvendit të Bujanocit, Enver Ramadani.
Lajmin mbi aprovimin e financimit të projektit në fjalë e ka bërë, Romina Kuko, kryetare e Këshillit Bashkiak të Tiranës nëpërmjet një postimi në facebook.
“Krenare që me votë unanime Tirana akordon një fond për rikonstruksionin e shkollës “Naim Frashëri” në Komunën e Bujanocit duke mbajtur fjalën e dhënë nga Kryetari Veliaj dhe kolegët e Këshillit duke treguar kështu me vepra mbështetjen e vëllezërve dhe motrave në Luginën e Preshevës” – ka shkuar kryesuesja Kuko.
Kujtojmë që projekti i ndërtimit të sallës së sporteve në shkollën fillore “Naim Frashëri” në Bujanoc, kap vlerën prej 550 mijë euro, e cila në tërësi do të financohet nga Bashkia e Tiranës./LUGINALAJMI/
