Bashkia e Tiranës, do të financojë ndërtimin e sallës së sportit të shkollës fillore “Naim Frashëri” në Bujanoc. Lajmin e ka bërë të ditur, kryetari i Kuvendit komunal të Bujanocit, Enver Ramadani, përmes një shkrimi në facebook.
“Nga vizita e fundit të zhvilluar në Bashkinë e Tiranës, morrëm premtimin nga kryetari Erijon Veliaj, që kryeqendra shqiptare – Tirana, do të financojë në plotni ndërtimin e palestrës sportive të shkollës fillore “Naim Frashëri” në Bujanoc, projekt ky që kap vlerën mbi 500 mijë euro.
Ky është projekti i parë, që Bashkia e Tiranës do të financojë në Komunën e Bujanocit.” – ka shkruar Ramadani.
Tutje, Ramadani ka shkruar: Le të jetë një fillim i mbarë dhe i hajrit që do të duhet të trashëgohet, kur vëllai i madh, ndihmon vëllain e vogël!
Kujtojmë që, gjatë së e martes dhe të mërkures delegacioni nga Komuna e Bujanocit, i kryesuar nga kryekuvendari Ramadani ka qenë për vizitë zyrtare të Tiranë, ku kanë takuar kryebashkiakun Erijon Veliaj dhe kryetaren e Këshillit Bashkiak, Romina Kuko.
Qëllimi i vizitës ishte vendosja e bashkëpunimit të ndërsjelltë ndërmjet Komunës së Bujanocit dhe Bashkisë së Tiranës, gjë që tani ka nisur mbarë./LUGINALAJMI/
