Në sheshin e Bujanocit është shfaqur një mbishkrim me emrin e ish-gjeneralit serb, Ratko Mladiç, i dënuar për gjenocid në Srebrenicë. Ky veprim u cilësua si provokim nga përfaqësues politikë shqiptarë në Luginë të Preshevës.
Sot, kryetari i Degës së PVD-së në Bujanoc, Ragmi Mustafi, së bashku me djalin e tij, e fshiu publikisht mbishkrimin në murin e fontanës në qendër të qytetit. Në postimin e tij shoqëruar me fotografi nga vendi i ngjarjes, Mustafi theksoi se vendosi të ndërhyjë vetë pas heshtjes së institucioneve.
Veprimi i tij është pritur pozitivisht nga qytetarë shqiptarë të Bujanocit, të cilët e kanë vlerësuar si reagim ndaj glorifikimit të kriminelëve të luftës në hapësirat publike.
Kujtojmë se një ditë më parë ndaj këtij rasti reaguan deputeti Shaip Kamberi, kryetarja e Preshevës Ardita Sinani, kryetari i Këshillit Kombëtar Shqiptar Enkel Rexhepi, si dhe kryetari i komunës së Bujanocit Arbër Pajaziti, të cilët e cilësuan mbishkrimin provokim dhe fyerje për viktimat e luftës./LUGINALAJMI/
