Deputeti i vetëm shqiptar në Kuvendin e Serbisë, njëherit kryetari i Partisë për Veprim Demokratik Shaip Kamberi, ka përshëndetur kërkesën e ministrit të Jashtëm të Shqipërisë, Ferit Hoxha, për hapjen e Konsullatës së Republikës së Shqipërisë në Bujanoc.
Përmes një reagimi publik, Kamberi e ka cilësuar këtë iniciativë si të rëndësishme dhe të vonuar, duke theksuar nevojën për konkretizimin e saj.
“E përshëndes kërkesën e Ministrit Ferit Hoxha për hapjen e Konsullatës së Republikës së Shqipërisë në Bujanoc. Iniciativa për hapjen e kësaj konsullate tashmë ka kaluar një periudhë të konsiderueshme që nga ndërmarrja e saj, ndaj konsideroj se ka ardhur koha që ajo të konkretizohet”, ka shkruar Kamberi.
Ai ka shprehur gjithashtu shpresën që pas zhvillimeve të fundit dhe takimit ndërmjet ministrave të jashtëm të Shqipërisë dhe Serbisë, kjo çështje të marrë rrugën e zbatimit.
“Shpresoj që pas takimit të sotëm kjo çështje të marrë rrugën e zbatimit dhe të finalizohet sa më shpejt”, ka theksuar Kamberi.
Hapja e një konsullate shqiptare në Bujanoc konsiderohet si një hap i rëndësishëm për përfaqësimin institucional dhe lehtësimin e shërbimeve për qytetarët shqiptarë në Luginën e Preshevës./LUGINALAJMI/
