Zëvendëskryeministri i parë në detyrë i Qeverisë së Kosovës, Besnik Bislimi, ka bërë të ditur se ka informuar përfaqësuesin e posaçëm të Bashkimit Evropian për dialogun Kosovë–Serbi, Peter Sørensen, për një situatë që po prek drejtpërdrejt jetën e komunitetit shqiptar në Preshevë, Bujanoc dhe Medvegjë.
Ai ka theksuar se në Luginë sot mësojnë 3.650 fëmijë shqiptarë, të cilët përdorin mbi 35 mijë tekste shkollore të siguruara nga Qeveria e Kosovës, në bazë të kërkesës së paraqitur nga Këshilli Kombëtar Shqiptar. Sipas Bislimit, institucionet e Kosovës kanë përmbushur të gjitha detyrimet e tyre ligjore dhe organizative pa asnjë vonesë.
Megjithatë, pagesa prej 304 mijë eurosh e dedikuar për tekstet shkollore, aktivitetet ndërkombëtare të avokimit dhe funksionimin e KKSH-së është bllokuar tri herë radhazi nga banka pranuese në Serbi. Në të gjitha rastet, transferet janë refuzuar pa dhënë asnjë shpjegim apo arsye zyrtare. Sipas Bislimit, kjo nuk duket të jetë një pengesë teknike, por një model administrativ që krijon barriera të panevojshme ndaj mbështetjes së ligjshme për komunitetin shqiptar në Luginë.
Ai ka kujtuar se qasje të ngjashme janë vërejtur edhe më herët, përfshirë anulimin e vendimit të KKSH-së për subvencionet bujqësore për fermerët shqiptarë, pavarësisht se të gjitha procedurat ishin kryer në mënyrë të rregullt.
Institucionet e Kosovës, thotë Bislimi, i kanë dorëzuar BE-së të gjitha dokumentet që dëshmojnë këto bllokime – komunikimet bankare, kthimet e fondeve dhe dokumentacionin e vendimeve qeveritare.
Ai shton se Kosova mbetet e përkushtuar ndaj dialogut, por nuk mund të qëndrojë e heshtur kur mekanizmat administrativë përdoren në mënyrë që cenon të drejtat dhe jetën e përditshme të shqiptarëve në Preshevë, Bujanoc dhe Medvegjë./LUGINALAJMI/
