Në pikëkalimin kufitar ndërmjet Kosovës dhe Serbisë, të quajtur “Dheu i Bardhë”, janë konfiskuar mallra të padeklaruara, përfshirë pjesë të përdorura për automjete, me vlerë rreth 4 mijë euro.
Sipas njoftimit të Doganës së Kosovës, gjatë kontrolleve të rregullta në Zyrën e Brendshme Doganore në Dheun e Bardhë, është paraqitur një ngarkesë mallrash, ku gjatë ekzaminimit zyrtar doganierët kanë konstatuar mallra të padeklaruara. Malli i zbuluar përfshinte pjesë të përdorura për automjete, të futura pa u deklaruar sipas procedurave ligjore doganore.
Pas verifikimit, vlera e mallit të konfiskuar është vlerësuar në rreth 4.000 euro. Mallrat janë ndaluar, ndërsa ndaj palës përgjegjëse është iniciuar procedurë për kundërvajtje doganore, në bazë të nenit 244 të Kodit Doganor dhe të Akcizës së Kosovës.
“Me fokus mbrojtjen e tregut dhe interesit publik, Dogana e Kosovës vazhdon angazhimin e saj për zbatimin efektiv të ligjit dhe parandalimin e shkeljeve doganore”, thuhet në njoftimin e Doganës së Kosovës./LUGINALAJMI/
