-Foto ilustrim-
Përkundër kërkesës së Trupit Koordinues drejtuar Komunës së Bujanocit për largimin e posterit me portretin e Komandant Lleshit nga qendra e qytetit, është vetë kryetari i komunës, Arbër Pajaziti, që ka reaguar në një mënyrë të kundërt.
Pajaziti, përmes një postimi publik në rrjetin social Facebook, ka ftuar qytetarët të marrin pjesë në manifestimin tradicional “Ditët e Komandant Lleshit”, duke e cilësuar atë si një “homazh dinjitoz për figurën më sublime të historisë sonë më të re”.
“Ju ftojmë të bëheni pjesë e manifestimit ‘Ditët e Komandant Lleshit’, një homazh dinjitoz për figurën më sublime të historisë sonë më të re, Komandant Lleshin – simbol i qëndresës, i lirisë dhe i sakrificës. Përmes vizitave, homazheve dhe koncertit përkujtimor, le të tregojmë mirënjohjen tonë të thellë dhe të ruajmë me nder kujtimin e tij”, ka shkruar Pajaziti.
Reagim ndaj kërkesës së Trupit Koordinues ka pasur gjithashtu edhe nga Organizata e Veteranëve të Luftës së UÇPMB-së në Bujanoc, e cila e ka kundërshtuar publikisht kërkesën për largimin e portretit të Komandant Lleshit.
Në deklaratën e tyre thuhet se:
“Nuk kanë arsye të shqetësohen serbët dhe romët sepse UÇPMB nuk ka qenë ushtri terroriste, por ushtri çlirimtare që ka bërë luftë kundër një regjimi, të cilin e ka luftuar edhe NATO. UÇPMB ka qenë ushtri e dalë nga gjiri i popullit për të mbrojtur pragun e shtëpisë.”
Veteranët theksojnë se UÇPMB ka qenë e njohur ndërkombëtarisht, madje edhe nga vetë shteti i Serbisë, dhe se kërkesat për largimin e simboleve të saj janë shenjë e qasjeve të vjetra politike, të cilat mohojnë të drejtat dhe historinë e komunitetit shqiptar.
Në postimin e plotë të OVL-UÇPMB-së thuhet:
“Si pjesë e organizimit të manifestimit për ditët e Ridvan Qazimit – Komandant Lleshi, kundërshtojmë kategorikisht kërkesën e udhëheqësit të Trupit Koordinues për largimin e pllakës me foton e Komandant Lleshit nga qendra e qytetit në Bujanoc. Me këso veprime, politikanët serbë tregojnë se ende vazhdojnë të jetojnë me idetë e kaluarës së tyre, e cila asnjëherë nuk i ka respektuar të drejtat e komuniteteve të tjera.”
Manifestimi “Ditët e Komandat e Lleshit”, do të zhvillohet nga 23 maji deri më 25 maj./LUGINALAJMI/
