Ushtruesi i detyrës së drejtorit të Shërbimit të Trupit Koordinues të Qeverisë së Serbisë për komunat Preshevë, Bujanoc dhe Medvegjë, Nenad Mitroviq, ka zhvilluar takim me kryetarin e Odës Ekonomike Rajonale të rretheve Jabllanicë dhe Pçinjë, Goran Joviq, kryetarin e Parlamentit të Odës Rajonale të Ekonomisë dhe drejtorin e përgjithshëm të kompanisë “Simpo”, Sllaxhan Disiq, si dhe me bashkëpunëtorin e Odës Ekonomike të Serbisë në Bujanoc, Lulzim Rashiti.
Gjatë takimit u diskutua për përmirësimin e bashkëpunimit ekonomik në komunat Preshevë, Bujanoc dhe Medvegjë, si dhe për mbështetjen e bizneseve përmes iniciativave dhe projekteve të përbashkëta. Një vëmendje e veçantë iu kushtua krijimit të një ambienti më të favorshëm për zhvillimin e biznesit dhe tërheqjen e investimeve, si faktorë kyç për zhvillimin ekonomik të mëtejshëm të këtyre komunave.
Palët u pajtuan se lidhja e institucioneve lokale dhe rajonale është parakusht për përparim të qëndrueshëm ekonomik dhe hapjen e vendeve të reja të punës.
“Shërbimi i Trupit Koordinues mbetet i përkushtuar në zgjidhjen e të gjitha sfidave dhe përmirësimin e cilësisë së jetës së qytetarëve”, theksoi Mitroviq, duke ripërsëritur angazhimin për zhvillimin e tri komunave të Luginës së Preshevës.
