Dje u pensionua profesori i gjuhës dhe letërsisë shqipe, Metali Krasniqi, nga shkolla e mesme “Sezai Surroi” në Bujanoc. Pas më shumë se tri dekadash pune të palodhshme, ai u përcoll me një ceremoni të ngrohtë mes kolegëve dhe nxënësve, ku u vlerësua për profesionalizmin, korrektësinë dhe përkushtimin e tij ndaj arsimit dhe gjuhës shqipe. Në shenjë mirënjohjeje, shkolla e shpërbleu me një dhuratë simbolike, duke e cilësuar kontributin e tij si pjesë të pandarë të historisë së institucionit.
Urimeve iu bashkua edhe profesori i gjuhës angleze dhe ish-kryetari i Kuvendit Komunal të Bujanocit, Enver Ramadani, i cili e cilësoi daljen në pension të profesor Krasniqit si përmbyllje të një rrugëtimi profesional me nder dhe dinjitet. Ai kujtoi edhe fillimet e vështira të tij, kur përballoi papunësinë duke kontribuar si gazetar e publicist, për t’u bërë më pas udhërrëfyes i breza të tërë nxënësish. Sipas Ramadani, klasa e profesor Krasniqit nuk ishte vetëm një hapësirë ku mësohej gramatika e letërsia, por edhe një vend ku nxënësit frymëzoheshin të duan gjuhën e tyre, të mendojnë lirshëm dhe të jenë krenarë për identitetin e tyre. Dalja e tij në pension u vlerësua si një kapitull i ri, i mbushur me reflektime mbi punën dhe ndikimin e madh që ka lënë pas. Emri dhe kontributi i profesor Metali Krasniqit do të mbesin gjithmonë të nderuar në historinë e arsimit në Bujanoc./LUGINALAJMI/
