Një zjarr i madh ka përfshirë pyjet mbi fshatin Miratoc të komunës së Preshevës në mesditën e së dielës, duke shkaktuar një situatë emergjente me përmasa shqetësuese. Flakët janë përhapur me shpejtësi dhe po rrezikojnë seriozisht shtëpitë e banuara me qytetarë dhe mjedisin përreth.
Në një reagim urgjent, kryetarja e Komunës së Preshevës, Ardita Sinani, ka bërë thirrje për mobilizim të menjëhershëm të qytetarëve, në veçanti të banorëve të Miratocit, për të ndihmuar në shuarjen e zjarrit dhe mbrojtjen e vendbanimeve.
“Ju bëjmë thirrje të mobilizohemi urgjentisht për mbrojtjen e fshatit Miratoc nga përhapja e zjarrit që po kërcënon shtëpitë dhe mjedisin përreth,” thuhet në njoftimin e saj zyrtar.
Komuna e Preshevës, sipas kryetares, ka kontaktuar institucionet relevante për ndërhyrje nga ajri. Aktualisht, tre helikopterë janë të angazhuar në zona të tjera të Serbisë ku situata është më e rëndë, por autoritetet presin ndërhyrjen edhe në zonën e Miratocit.
Ndërkohë, qytetarët janë ftuar të ndihmojnë në terren me mjete dhe makineri të përshtatshme si bagerë, traktorë, cisterna me ujë dhe çdo pajisje tjetër që mund të ndihmojë në përballimin e situatës.
“Ndihma e secilit prej jush është jetike! Së bashku për mbrojtjen e jetës, shtëpive dhe natyrës sonë!” – përfundon thirrja e kryetares Sinani.
Autoritetet lokale mbeten në gatishmëri të plotë, ndërsa u bëhet thirrje qytetarëve që të veprojnë me kujdes dhe të ndihmojnë në mënyrë të koordinuar për të shmangur rreziqet./LUGINALAJMI/
