Një arritje e veçantë në fushën e arsimit vjen nga Medvegja, ku nxënësi shqiptar Dren Halimi ka shënuar një sukses të rëndësishëm në garën rajonale të gjuhës angleze, të mbajtur në Leskoc, duke siguruar kualifikimin për garat republikane që do të zhvillohen në Beograd.
Dreni është nxënës i klasës IV3 në shkollën e mesme teknike “Nikolla Tesla” në Medvegjë dhe dallohet për përgatitjen e tij të shkëlqyer dhe nivelin e lartë të njohurive. Në këtë garë, ai u rendit ndër nxënësit më të mirë, duke konfirmuar potencialin dhe përkushtimin e tij në fushën e gjuhëve të huaja, shkruan Medvegja.net, përcjell LUGINALAJMI.
Ajo që e bën edhe më të veçantë këtë sukses është fakti se, falë rezultateve të tij të larta në mësime dhe në përputhje me legjislacionin në fuqi, Dreni po përfundon dy vite shkollore brenda një viti kalendarik – një arritje e rrallë që kërkon disiplinë të jashtëzakonshme, përkushtim dhe punë të vazhdueshme.
Ky sukses nuk është vetëm personal, por përfaqëson një moment krenarie edhe për familjen e tij, për shkollën dhe për gjithë komunitetin shqiptar në Medvegjë. Në një mjedis shpesh sfidues, arritje të tilla dëshmojnë se puna dhe angazhimi mund të japin rezultate të dukshme dhe të prekshme.
Kualifikimi i Dren Halimit për garat republikane në Beograd shihet si një hap i rëndësishëm në rrugëtimin e tij arsimor dhe një mundësi për të përfaqësuar me dinjitet shkollën dhe komunitetin nga i cili vjen./LUGINALAJMI/
