Një shtetas i Maqedonisë së Veriut (1992) është arrestuar nga policia serbe pranë fshatit Miratoc, në komunën e Preshevës, pasi u kap duke transportuar një sasi të madhe duhani për nargjile pa dokumentacion përkatës.
Sipas njoftimit të Ministrisë së Punëve të Brendshme, i dyshuari po transportonte me një furgon rreth 3.000 kuti, që përmbanin gjithsej 750 kilogramë duhan për nargjile të markës “Jibiar”, pa pulla akcize të Republikës së Serbisë dhe pa dëshmi mbi prejardhjen e mallit.
Autoritetet dyshojnë se produktet e sekuestruara ishin të destinuara për shitje të mëtejshme, duke i shkaktuar buxhetit të shtetit një dëm të vlerësuar rreth 8 milionë dinarë.
Arrestimi është kryer nga pjesëtarët e Drejtorisë së Policisë Kriminale – Departamenti për luftimin e krimit ekonomik, në bashkëpunim me Policinë Kufitare dhe Policinë e Vranjës, me urdhër të Prokurorisë Themelore në Vranjë.
I dyshuari ngarkohet me veprën penale “qarkullim i paligjshëm i produkteve me akcizë”. Atij i është caktuar masa e ndalimit deri në 48 orë dhe do të dërgohet para prokurorisë përkatëse me kallëzim penal./LUGINALAJMI/
