Në mbledhjen e tetë të Qeverisë së Republikës së Kosovës është miratuar ndarja e mjeteve financiare për shqiptarët në Bujanoc, Preshevë dhe Medvegjë, në kuadër të një pakete mbështetëse që synon zhvillimin arsimor, kulturor dhe socio-ekonomik në këtë rajon.
Lajmin e ka bërë të ditur këshilltari i kryeministrit, Ragmi Mustafi, përmes një postimi në rrjetet sociale, duke theksuar se bëhet fjalë për një vendim të rëndësishëm që shkon përtej një alokimi të zakonshëm buxhetor.
Sipas tij, ky vendim përfaqëson një shprehje të përgjegjësisë shtetërore dhe solidaritetit kombëtar ndaj shqiptarëve që jetojnë jashtë kufijve të Kosovës. Ai ka rikujtuar se mbështetja për Luginën e Preshevës ka filluar edhe në mbledhjet e kaluara, përfshirë financimin e specializantëve nga kjo zonë.
Paketa e miratuar përfshin sigurimin e teksteve shkollore në gjuhën shqipe për mijëra nxënës, mbështetje për projekte kulturore dhe arsimore që synojnë ruajtjen e identitetit, si dhe programe të dedikuara për të rinjtë me fokus zhvillimin profesional dhe punësimin.
Në njoftim theksohet se këto masa nuk janë të fragmentuara, por pjesë e një qasjeje të strukturuar dhe afatgjatë, që synon adresimin e nevojave reale të komunitetit shqiptar në Luginën e Preshevës.
Po ashtu, është vlerësuar se vendimi reflekton përkushtimin e institucioneve të Kosovës për të vepruar në përputhje me standardet evropiane në mbrojtje të të drejtave të shqiptarëve në këtë rajon./LUGINALAJMI/
