-Foto ilustrim-
Kryetari i Bashkësisë Lokale të Tërnocit, Mustafa Alishani, përmes një postimi në rrjetin social Facebook ka njoftuar se ka marrë thirrje për t’u paraqitur në Gjykatën Themelore në Bujanoc, lidhur me vendosjen e flamurit kombëtar.
Në postimin e tij, Alishani shkruan se edhe këtë vit ka pranuar ftesë nga Gjykata për përdorimin e simboleve kombëtare, duke theksuar se, ndryshe nga vitet e kaluara, këtë herë Gjykata ka reaguar me ngut dhe e ka përshpejtuar procedurën.
“Dua ta sqaroj opinionin publik se përdorimi i simbolit kombëtar ka qenë dhe mbetet shprehje e identitetit, kulturës dhe përkatësisë sonë kombëtare, e garantuar nga të drejtat themelore të njeriut dhe standardet ndërkombëtare për mbrojtjen e të drejtave të pakicave”, ka shkruar Alishani.
Ai thekson se flamuri kombëtar është i shenjtë dhe se përdorimi i tij bëhet me krenari, duke mohuar çdo pretendim për qëllime provokuese apo nxitëse.
“Simbolet kombëtare nuk janë përdorur me asnjë qëllim provokues, nxitës apo kundër rendit kushtetues, por vetëm si shprehje paqësore e identitetit dhe traditës sonë”, ka shtuar ai, duke vlerësuar se respektimi i të drejtave për shprehje kulturore dhe kombëtare është thelbësor për bashkëjetesë, mirëkuptim dhe stabilitet shoqëror.
Në fund të reagimit, Alishani ka theksuar se pa barazi nuk ka drejtësi dhe pa drejtësi nuk mund të ketë shtet demokratik, duke përmbyllur mesazhin me fjalët:
“Flamuri, përtej çdo ftese dhe çdo gjykate, mbetet i shenjtë.”/LUGINALAJMI/
