Një takim i zhvilluar në Ambasadën e Shteteve të Bashkuara të Amerikës në Beograd ka sjellë sërish në vëmendje disa nga çështjet që lidhen me pozitën e shqiptarëve në Luginën e Preshevës. Kryetarja e Komunës së Preshevës, Ardita Sinani, u takua me zëvendës-ambasadorin amerikan Alexander Titolo, ku u diskutua për sfidat me të cilat përballet komuniteti shqiptar në këtë rajon.
Sipas njoftimit të bërë nga kryetarja e Preshevës, në takim është prezantuar një dokument që përfshin disa nga temat që shpesh ngriten nga përfaqësuesit lokalë, ndër to edhe praktika e pasivizimit të adresave të shqiptarëve. Kjo çështje është diskutuar në vitet e fundit nga organizata të të drejtave të njeriut dhe përfaqësues të komunitetit shqiptar, pasi lidhet me procedurat administrative dhe statusin civil të banorëve.
Përveç kësaj teme, në bisedë janë përfshirë edhe çështje të tjera që lidhen me jetën institucionale dhe zhvillimin e rajonit, si mosnjohja e diplomave të Kosovës, përfaqësimi i shqiptarëve në institucionet shtetërore, sfidat në arsim dhe nevoja për më shumë zhvillim ekonomik në Luginën e Preshevës.
Në takim u përmendën edhe disa çështje konkrete lokale, përfshirë konkurset për punësim në sektorin publik, diskutimet rreth shërbimit të detyrueshëm ushtarak dhe gjendjen e infrastrukturës në Shkollën Fillore “Prof. Ibrahim Kelmendi” në Preshevë.
Ndërkohë, çështjet që lidhen me pozitën e shqiptarëve në Luginën e Preshevës janë ngritur edhe në institucionet e Shteteve të Bashkuara të Amerikës. Komiteti për Punë të Jashtme i Dhomës së Përfaqësuesve në Kongresin Amerikan ka miratuar projekt-ligjin “Presheva Valley Discrimination Assessment Act”, i paraqitur nga kongresmeni Keith Self, i cili kërkon nga Departamenti Amerikan i Shtetit të përgatisë një raport mbi trajtimin e shqiptarëve në Preshevë, Bujanoc dhe Medvegjë. Në këtë dokument përmendet edhe praktika e pasivizimit të adresave si një nga çështjet që kërkon vëmendje në kuadër të vlerësimit të respektimit të të drejtave të pakicave./LUGINALAJMI/
