Më 5 mars 2025, u zhvillua seanca e dytë e Kuvendit Komunal të Bujanocit, ku një nga pikat kryesore të rendit të ditës ishte vazhdimi i mandatit të ushtruesve të detyrës së drejtorëve të ndërmarrjeve publike. Kështu, u vendos që mandatet e drejtorëve të rinj të ndërmarrjeve, si Biblioteka e Qytetit, Enti i Farmacisë, Shtëpia e Kulturës, Agjencia Turistike dhe Qendra Sportive, të zgjaten për një periudhë tjetër prej gjashtë muajsh.
Megjithatë, një shqetësim i madh ka lindur nga mungesa e drejtorëve të këtyre ndërmarrjeve, të cilët nuk ishin të pranishëm në seancë. Nuk dihet me siguri nëse ata ishin të ftuar për të marrë pjesë, por mungesa e tyre ka shkaktuar reagime të forta. Këshilltari Rahim Salihi nga Partia për Veprim Demokratik ka reaguar ashpër, duke e cilësuar këtë mungesë si “neglizhencë dhe papërgjegjshmëri totale.”
Në një postim në Facebook, Salihi ka shkruar: “Drejtorët e ndërmarrjeve publike të Bujanocit injoruan Kuvendin Komunal – nuk morën pjesë asnjëri prej tyre në seancën ku vetë ata u zgjodhën drejtorë. Kjo është një mungesë e theksuar përgjegjësie. Ata nuk panë të arsyeshme të marrin pjesë dhe të informojnë qytetarët për punën e tyre, çfarë kanë arritur gjatë 6 muajve të fundit dhe çfarë do të bëjnë në të ardhmen.”
Salihi ka theksuar se seanca ishte thirrur për të trajtuar çështjen e vazhdimit të mandateve të drejtorëve, por kjo ka reflektuar një mungesë të theksuar të transparencës dhe përgjegjësisë nga ana e qeverisjes lokale. Ai e ka cilësuar këtë si dëshmi të një qeverisjeje të fokusuar vetëm në interesat e ngushta klanore, duke lënë qytetarët pa informacion të mjaftueshëm për punën e institucioneve të tyre.
